Sigurður Tómas Magnússon, dómari við Landsrétt, hefur verið skipaður dómari við Hæstarétt Íslands. Þórdís Kolbrún sem sat fyrir hönd Áslaugar Örnu Sigurbjörnsdóttur, dómsmálaráðherra, lagði fram tillöguna í dag um að Sigurður verði skipaður þann 18. maí næstkomandi.
Sjá einnig: Hipsum-haps í umsögnum dómnefndar
Davíð Þór Björgvinsson og Jóhannes Sigurðsson drógu umsæknir sínar til baka þann 29. apríl síðastliðinn eftir að drög dómnefndar voru send til umsækjenda. Þegar Landsréttur var skipaður í heild sinni sumarið 2017 var það niðurstaða dómnefndar að Davíð Þór hefði verið hæfastur umsækjenda en hann hlaut ekki náð fyrir augum dómnefndar nú frekar en í desember síðastliðnum.
Aðrir umsækjendur um embættið voru Aðalsteinn E. Jónasson, dómari við Landsrétt, og Sigríður J. Friðjónsdóttir, ríkissaksóknari. Dómnefndin komst að þeirri niðurstöðu að allir umsækjendurnir uppfylltu almennu hæfisskilyrði embættisins en að Sigurður Tómas stæði öðrum umsækjendum skör framar.
