Verðtryggðar eignir Landsbankans jukust um rúmlega 22 milljarða umfram verðtryggðar skuldir á fyrri helmingi árs. Verðtryggingarjöfnuðurinn nemur nú samtals um 150 milljörðum króna. Í ársreikningi bankans segir að reynt sé að draga úr skekkjunni með því að auka óverðtryggðar lánveitingar og að auka verðtryggðar innstæður.
Til samanburðar er verðtryggingajöfnuður Arion jákvæður um rúma 48 milljarðara og um 9,8 milljarða hjá Íslandsbanka. Í árshlutareikningi Íslandsbanka kemur fram að 1% hækkun á vísitölu neysluverðs leiði til 98 milljóna króna tekna og 1% lækkun leiði til samsvarandi tekjutaps. Sé þetta heimfært yfir á Landsbankann nema tekjur við 1% hækkun vísitölunnar um 1,5 milljörðum króna.
Hreiðar Bjarnason, framkvæmdastjóri fjármálasviðs og markaðs- og fjárstýringasviðs hjá Landsbankanum, segir hækkun verðtryggingrajafnaðar frá áramótum skýrast af sölu Regins. Við það færðust lán til félagsins undan bankasamstæðunni yfir í að vera markaðslán. Yfir lengra tímabil hafi verðtryggð lán aukist mun minna en verðtryggðar lánveitingar, sem skýri að hluta misvægið. Enn fremur benda Landsbankamenn á að mikið eigið fé leiði til þess að einhvers staðar komi skekkjan fram eignamegin. Heyra má á Hreiðari og Steinþóri Pálssyni, bankastjóra, að þeir hafa ekki miklar áhyggjur af jöfnuðinum og segja að stærðin jafnist út yfir lengri tíma, þar sem nafnvextir haldi í raunvaxtastig.
Í nýjasta tölublaði Viðskiptablaðsins er að finna ítarlega úttekt á árshlutareikningum viðskiptabankanna þriggja. Áskrifendur geta nálgast tölublaðið hér að ofan undir liðnum tölublöð.