*

föstudagur, 17. september 2021
Innlent 11. ágúst 2021 16:38

Skeljungur leiðir hækkanir

Gengi hlutabréfa Skeljungs hækkaði mest í viðskiptum dagsins á Aðalmarkaði. Icelandair hækkaði um rúm 4%.

Ritstjórn

Grænt var yfir að litast á Aðalmarkaði Kauphallarinnar í dag, enda hækkaði gengi 14 félaga af þeim 20 sem skráð eru á markaðinn í viðskiptum dagsins. Heildarvelta viðskipta dagsins nam 3,2 milljörðum króna.

Þrátt fyrir það lækkaði OMXI10 úrvalsvísitalan um 0,13%, en líkt og nafn hennar gefur til kynna er hún samsett úr tíu félögum sem skráð eru á Aðalmarkað og endurspeglar því ekki gengi allra félaga.

Mest hækkaði gengi Skeljungs, eða um 4,47% í 20 milljóna króna viðskiptum. Stendur gengi félagsins í kjölfarið í 11,46 krónum á hlut. 

Í morgun var sagt frá því að breytingar verði gerðar á samþykktum félagsins sem fela í sér að megintilgangur þess verði fjárfestingastarfsemi. Eftir hádegi sendi Skeljungur þó frá sér tilkynningu þar sem stjórn félagsins áréttaði að engin ákvörðun hafi verið tekin varðandi hugmyndirnar um að breyta Skeljungi í skráð fjárfestingafélag.

Næst mest hækkaði gengi hlutabréfa Icelandair sem hækkaði um 4,05% í 105 milljóna króna viðskiptum. Stendur gengi bréfa flugfélagsins nú í 1,54 krónum á hlut, sem er 54% yfir útboðsgengi bréfa félagsins í hlutafjárútboði sem fór fram fyrir tæpu ári síðan. Þá nartaði Eik fasteignafélag í hæla flugfélagsins með 4,02% hækkun.

Gengi þriggja félaga, Arion banka, Brims, Haga, Marels, Sjóvár og Sýnar lækkaði í viðskiptum dagsins. Í öllum tilfellum var þó um innan við 1% lækkun að ræða.

Stikkorð: Kauphöll Nasdaq