Donald Trump fyrrverandi forseti Bandaríkjanna þarf að leggja fram tryggingu fyrir 464 milljóna dala sekt í dag. Að öðrum kosti verða eignir hans gerðar upptækar af saksóknaraembætti New York borgar.
Trump, sem var sakfelldur fyrir fjársvik í síðasta mánuði, fékk 30 daga til að leggja fram tryggingu fyrir sektinni sem samsvarar um 64 milljörðum króna. Trump hefur ekki tekist að verða sér út um skuldabréf með veði í eignum.
Samkvæmt Financial Times eru valmöguleikar forsetaframbjóðandans takmarkaðir en frá og með deginum í dag getur saksóknaraembættið óskað eftir því að sýslumaður frysti bankareikninga Trump.
Það gæti reynst örlítið flóknara að kyrrsetja fasteignir Trumps þar sem þær eru flestar í eigu hlutafélaga. Þrátt fyrir að hann sé raunverulegur eigandi félaganna gæti saksóknaraembættið þurft að fá dómsúrskurð til að mega kyrrsetja eignirnar.
Ákveði saksóknaraembættið að kyrrsetja og síðan selja fasteignir Trump þarf embættið lögum samkvæmt að auglýsa þær til sölu í lögbirtingarblaði og fjölmiðlum í að minnsta kosti 56 daga. Þær yrðu í kjölfarið seldar á uppboði.
Samkvæmt FT færi sambærilegt ferli, með smávægilegum breytingum, í gang í Flórída ríki ákveði saksóknari að kyrrsetja Mar-a-Lago sveitasetur Trump í Flórída.
Saksóknaraembættið gæti þó byrjað í dag að haldleggja lausafjármuni eins og listaverk en það myndi einungis taka örfáar mínútur að fá dómsúrskurð fyrir slíkri aðgerð.
Ýmsar undantekningarreglur gilda þó um haldlagningu lausafjármuna í Bandaríkjunum. Trump má til dæmis halda eftir einu ökutæki sem þó ekki vera meira en vera meira virði en 4 þúsund dalir sem samsvarar um 550 þúsund krónum. Þá má heldur ekki haldleggja biblíur í eigu forsetans svo dæmi séu tekin.
Samkvæmt FT þarf saksóknaraembætti að stíga varlega til jarðar þar sem Trump er í miðju forsetaframboði og gæti það haft slæmar stjórnmálalegar afleiðingar að ganga of hart fram.
Ef saksóknaraembættið ákveður að ganga ekki of hart fram stendur því til boða að frysta eignir Trump sem kemur í veg fyrir að hann komi eignum undan.
Þá gæti embættið einnig krafið Trump um að opinbera skuldastöðu sína og greina frá öllum veðum sem eru í fasteignaveldi hans en eignir hans eru margar mjög skuldsettar.
Þetta gæti komið sér illa fyrir Trump sem hefur ítrekað ýkt auð sinn á opinberum vettvangi.
Hvað kostar skuldabréfið?
Ef Trump takist ólíklega að verða sér út um skuldabréf til tryggingar á greiðslu sektarinnar gæti það reynst dýrt. Í raun er um að ræða plagg sem staðfestir að skuldari eigi fyrir skuldinni í eignum og lausafé en í flestum tilfellum er óskað eftir skuldabréfi sem tryggi 100% af greiðslu skuldarinnar.
Í tilfelli Trump er þó áætlað að hann þurfi að leggja fram skuldabréf til tryggingar á 570 milljónum dala eða sem nemur 120% af skuldinni vegna þeirri stöðu sem hann er í. Ábyrgðaraðili myndi í flestum tilfellum óska eftir 3% í greiðslu fyrir að gangast í ábyrgð fyrir Trump. Samsvarar það um 18,5 milljónum dala sem Trump fengi ekki aftur þótt hann yrði sýknaður í áfrýjunardómstóli.
Hvað með Truth Social?
Á föstudaginn samþykktu hluthafar Truth Social að sameinast sérhæfða yfirtökufélaginu Digital World Aquisition og fara þannig með samfélagsmiðilinn á markað. Hlutur Trump í Truth Social er metinn á 3 milljarða dali en hann má þó ekki selja bréfin fyrr en eftir sex mánuði.
Það er ómögulegt að áætla hversu mikil virði bréfin í DWA verða eftir sex mánuði en markaðsvirði Truth Social eftir sameininguna er í engu samræmi við raunverulegt virði samfélagsmiðilsins.
Ef hann myndi sækjast eftir láni með veði í bréfinu væri ábyrgðaraðili lánsins að taka á sig töluverða áhættu. Trump gæti reynt að leggja fram tryggingu með samblöndu af reiðufé, hlutabréfum í Truth Social og fasteignum til að dreifa áhættunni.
Að lokum gæti Trump óskað eftir greiðsluskjóli en hann þyrfti þá að segjast vera gjaldþrota. Þetta gæfi forsetanum fyrrverandi tíma til að koma eignum í verð og auka handbært fé sitt.
Samkvæmt heimildum FT hefur Trump slegið þessa hugmynd út af borðinu vegna þess það myndi hafa afar neikvæð áhrif á forsetaframboð hans.