Mikill tími fer í það að svara erindum frá samkeppnisyfirvöldum vegna mála sem aldrei verður neitt úr, að sögn Steins Loga Björnssonar, forstjóra Skipta, móðurfélags Símans, Mílu og tengdra fyrirtækja. Hann segir í samtali við Viðskiptablaðið mörg málanna sem komi inn á borð til sín teygja anga sína mörg ár aftur í tímann, jafnvel til ársins 2001 þegar fyrirtækið var enn í eigu ríkisins og að stíga sín fyrstu skref í alvöru samkeppnisrekstri.
Steinn Logi bendir á að það sé mat stjórnenda Skipta sem og lögfræðinga félagsins að mörg þeirra mála sem um ræðir séu flókin og oft á tíðum matskennd. Það eigi sérstaklega við um þegar metið er hvort markaðsráðandi staða á tilteknum markaði hafi verið misnotuð.
Rætt er við Stein Loga í ítarlegu viðtali í síðasta tölublaði Viðskiptablaðsins. Hann segir m.a. að stjórnendur Skipta hafi verið innleidd það sem sé kallað samkeppnisréttaráætlun að evrópskri fyrirmynd og hafi starfsmenn Skipta og dótturfélaga, stjórnarmenn og fleiri sótt námskeið um samkeppnisrétt.
„Það er búið að uppfæra siðareglur félaganna og tengja þær með beinni hætti við samkeppnisréttaráætlunina og síðan höfum við í samstarfi við Póst og fjarskiptastofnun búið til sérstakt og umfangsmikið aðgangsstýringakerfi starfsmanna hér innanhúss. Hér er lögð mikil áhersla á að starfsmenn fari að samkeppnislögum og þessi atriði eiga að hjálpa mönnum til frambúðar,“ segir hann.