*

föstudagur, 14. ágúst 2020
Erlent 15. mars 2020 22:28

Stýrivextir í 0% og risavaxin innspýting

Bandaríski seðlabankinn hefur lækkað stýrivexti í 0% og hyggst kaupa skuldabréf fyrir 700 milljarða dala.

Ritstjórn
Jerome Powell, seðlabankastjóri Bandaríkjanna, hefur verið undir miklum þrýstingi frá forsetanum um að lækka vexti.
epa

Seðlabanki Bandaríkjanna tilkynnti nú fyrir skömmu að stýrivextir yrðu lækkaðir úr 1-1,25% í 0-0,25%, og innspýting í fjármálakerfið upp á 700 milljarða dala – um 95 þúsund milljarðar króna – framkvæmd. Er þetta gert til að slá á neikvæð efnahagsáhrif kórónufaraldursins.

Innspýtingin verður svokölluð magnbundin íhlutun (e. quantitative easing), sem felur í sér kaup bankans á skuldabréfum á markaði. 500 milljörðum dala verður varið í kaup á ríkisskuldabréfum, og 200 milljarðar munu fara í kaup á fasteignaveðskuldabréfum opinberra lánastofnana (e. agency-backed mortgage securities). Kaupin eru sögð munu hefjast á morgun með 40 milljarð dala innspýtingu.

Aðrir vextir bankans voru einnig lækkaðir mikið, meðal annars veðlánavextir, sem lækkuðu úr 1,5% í 0,25%, auk þess sem lánstíminn var lengdur í 90 daga.

Þá var bindiskylda banka – sem segir til um hversu mikið seðlabankafé (innstæður hjá seðlabankanum eða seðlar og mynt) bankar þurfa að eiga í hlutfalli við heildarinnstæður og skammtímaskuldir sínar – var einnig afnumin.

Ennfremur var tilkynnt um samstarfssamninga við alla helstu seðlabanka heims um að tryggja aðgang að lausafé í bandaríkjadölum með gjaldeyrisskiptasamningum.

Jerome Powell seðlabankastjóra Bandaríkjanna hefur verið legið á hálsi af Donald Trump forseta fyrir að lækka ekki vexti og gera meira til að mæta neikvæðum efnahagsáhrifum faraldursins, nú síðast í harðorðri ræðu í gær.

Frétt CNBC.

Stikkorð: Jerome Powell