*

laugardagur, 27. nóvember 2021
Fólk 1. október 2021 17:15

Þorlákur og Aníta ráðin til Fossa

Aníta Rut Hilmarsdóttir og Þorlákur Runólfsson hafa verið ráðin í eignastýringarteymi Fossa markaða.

Ritstjórn
Þorlákur Runólfsson og Aníta Rut Hilmarsdóttir
Aðsend mynd

Fossar markaðir hafa ráðið til starfa tvo nýja starfsmenn í teymi eignastýringar félagsins, Anítu Rut Hilmarsdóttur og Þorlák Runólfsson. Bæði koma til starfa í dag, á sama tíma og eignastýring Fossa flytur í nýtt húsnæði félagsins í Næpunni, á Skálholtsstíg 7 í Reykjavík. Fossar fengu starfsleyfi fyrir eignastýringu í maí síðastliðnum.

Aníta Rut Hilmarsdóttir kemur til Fossa frá markaðsviðskiptum Arion banka þar sem hún starfaði frá árinu 2019. Áður starfaði Aníta í eignastýringu fagfjárfesta Arion banka frá 2016 til 2019.

Hún er meðal stofnenda Fortuna Invest, vettvangs á Instagram sem veitir fræðslu um fjárfestingar. Aníta er með BSc gráðu í viðskiptafræði frá Háskólanum í Reykjavík og hefur lokið prófi í verðbréfaviðskiptum.

Þorlákur Runólfsson hefur áralanga reynslu af störfum á fjármálamörkuðum og víðtæka reynslu af eignastýringu. Hann starfaði í Landsbankanum við lánshæfismat og rekstur framtakssjóða á árunum 1999-2001 og síðar á eignastýringarsviði Kaupþings til ársins 2009. Þar gegndi hann meðal annars stöðu forstöðumanns einkabankaþjónustu. Þá starfaði Þorlákur við eignastýringu í Lúxemborg á árunum 2009 til 2015.

Þorlákur er með BA gráðu í hagfræði frá Háskóla Íslands og hefur jafnframt lokið prófi í verðbréfaviðskiptum.

Anna Þorbjörg Jónsdóttir, framkvæmdastjóri eignastýringar Fossa:

„Við hjá Fossum fögnum þessum öfluga liðsauka. Eignastýringin býður upp á fjárfestingarráðgjöf, einkabankaþjónustu og stýringu eignasafna. Það er skemmtilegt að fá þau Anítu og Þorlák til starfa á sama degi og eignastýringin færir sig yfir í Næpuna og við hlökkum til áframhaldandi uppbyggingar og spennandi verkefna með viðskiptavinum okkar.“

Magnús Stephensen, þriðji og síðasti landshöfðingi Íslands, reisti húsið Næpuna við Skálholtsstíg 7 í Reykjavík árið 1903. Hann bjó svo í húsinu frá 1904 til dauðadags 1917. Næpan, sem er tveggja hæða 500 fermetra timburhús með rishæð og steyptum kjallara, er talin draga nafn sitt af turni hússins. Húsið teiknaði Magnús Th. S. Blöndal byggingameistari og athafnamaður í Reykjavík. Húsið var í eigu Stephensen-fjölskyldunnar fram yfir 1920 en hefur verið í eigu ýmissa aðila síðan þá.