Á morgun verður byrjað að taka á móti timbri og öðru efni sem notað verður í áramótabrennurnar í Reykjavík.
„Best er að fá hreint timbur á brennurnar og stærstur hluti þess sem fer á brennurnar eru vörubretti en einnig er fenginn afgangur af jólatrjáasölu," segir á vef Reykjavíkurborgar. „Plast, gúmmí og unnið timbur á ekki erindi í köstinn. Starfsmenn hverfastöðva Reykjavíkurborgar verða á vettvangi við flestar brennurnar og leiðbeina þeim sem koma með efni. Hætt verður að taka á móti efni þegar brennurnar eru orðnar hæfilega stórar eða í síðasta lagi kl. 12:00 á gamlársdag."
Fjórar stórar áramótabrennur og sex litlar verða í borginni á gamlárskvöld. Stærð brennanna ræðst af mati Eldvarnareftirlitsins á aðstæðum á hverjum stað og er það óbreytt frá fyrra ári.
Eldur verður borinn að köstunum klukkan 20.30 á öllum stöðunum nema Úlfarsfelli, þar verður eldurinn tendraður klukkan 14.30.
Hér er listi yfir brennurnar í borginni:
- Við Ægisíðu - stór brenna.
- Skerjafjörður gegnt Skildinganesi 48 - lítil brenna.
- Við Suðurhlíðar, neðan við Fossvogskirkjugarð - lítil brenna.
- Vestan Laugarásvegar móts við Valbjarnarvöll - lítil brenna.
- Geirsnef - stór brenna.
- Við Suðurfell - lítil brenna.
- Fylkisbrennan við Rauðavatn - stór brenna.
- Gufunes við gömlu öskuhaugana - stór brenna.
- Kléberg á Kjalarnesi - lítil brenna.
- Úlfarsfell á athafnasvæði Fisfélagsins ofan við Lambhagaveg - lítil brenna.