Gjaldþrotaskiptum Eignarhaldsfélagsins RS ehf., áður RedSquare Invest ehf., er lokið og fundust engar eignir í búinu. Lýstar kröfur voru 22,5 milljarðar króna.
Félagið var í jafnri eigu Jóns og Sturlu Snorrasona en félagið skilaði síðast ársreikningi fyrir árið 2014 þar sem tekið var fram að málaferlum félagsins við Glitni hf. og Icebank hf. vegna óuppgerðra viðskiptasamninga myndi hafa afgerandi áhrif á framtíð félagsins.
Árið 2015 var Eignarhaldsfélagið dæmt í Hæstarétti til að greiða Glitni 5,5 milljarða króna skuld en bankinn höfðaði mál gegn félaginu til greiðslu á tveimur afleiðusamningum, annars vegar um framvirk skuldabréfakaup og hins vegar skiptasamnings.
Deilt var um gildi fyrri samningsins fyrir dómi en fyrirsvarsmenn RS höfðu undirritað almenna skilmála markaðsviðskipta Glitnis og áttu frumkvæðið að viðskiptunum.
Endanlegur samningur var aldrei undirritaður en af samskiptum aðila um framlengingu samningsins og þar sem RS væri fagfjárfestir taldi Hæstiréttur samningi vera komið á.
Áttu hátt í 400 milljón hluti í Glitni
Samkvæmt efnahagsreikningi árið 2014 voru eignir félagsins metnar á 2,2 milljarða og bókfært eigið fé í árslok var neikvætt um 781 milljón. Eignir félagsins undir lok líftíma þess var að mestu bundið í skuldabréf en á árum áður átti félagið töluvert af hlutabréfaeignum bæði hérlendis og erlendis.
FL Group keypti til að mynda 80 milljón hluti í Glitni af félaginu árið 2006 á genginu 16,6 krónur sem samsvaraði 1,3 milljarða krónum. Jón Snorrason var á þeim tíma stjórnarmaður í Glitni en eftir viðskiptin átti RedSquare Invest um 397 milljón hluti í Glitni.
Með úrskurði héraðsdóms Reykjavíkur í október 2016 var félagið tekið til gjaldþrotaskipta og lauk þeim í mars á þessu ári.
