Haraldur Guðni Eiðsson, forstöðumaður samskiptasviðs bankans, segir í samtali við mbl.is að bankinn hafi talið að það væri eins fljótt og auðið var en þá var komin skýr mynd á uppsagnirnar. Bankinn sagði 100 manns upp síðastliðinn fimmtudag.
Allir sem vissu af uppsögnunum voru settir á innherjalista og máttu því m.a. ekki tjá sig um uppsagnirnar eða versla með hlutabréf bankans.
„Við upplýstum formann trúnaðarmannaráðs hátt í viku áður en uppsagnirnar áttu sér stað en vissulega var hans staða þröng. Við upplýstum svo hina trúnaðarmennina að morgni dags, þegar þetta voru orðnar opinberar upplýsingar,“ segir Haraldur.
„Það var okkar mat að þetta væri eins fljótt og auðið var. Þegar komin var mynd á aðgerðirnar og nokkuð ljóst í hvað stefndi þá fékk hann þessar upplýsingar.“