Vinstri Hreyfiningin - Grænt framboð leggur til að Seðlabanki Íslands verði styrktur með því að auka gjaldeyrisvaraforðann um allt að 80 milljarða og styrkja eigið fé hans til viðbótar um allt að 40 milljarða með innlendu skuldafjárútboði.

Þetta kemur fram í tilkynningu frá VG um tillögur í efnahagsmálum.

Þá er einnig lagt til að Að ríkisstjórnin geti boðið út á innlendum markaði sérstök sparnaðarskuldabréf til almennrar sölu að hámarki 2 milljónir króna á hvern einstakling til minnst 5 ára í senn og verði vaxtatekjur undanþegnar fjármagnstekjuskatti.

10 milljarðar til styrkingar sveitafélaga og aðgerðir til að draga úr ójöfnuði

Þá leggja Vinstri grænir til að bæta fjárhagsstöðu illa settra sveitarfélaga með því að verja til þeirra allt að 5 milljörðum króna gegnum Jöfnunarsjóð sveitarfélaga. Einnig er lagt til að tekjuskipting ríkis og sveitarfélaga verði endurskoðuð.

Í tillögum VG er einnig lagt til að 5 milljörðum króna verði varið til jöfnunaraðgerða, „sem beinast einkum að þeim byggðarlögum sem glíma við samdrátt. Sérstaklega verði hugað að aðgerðum sem skapa konum störf, vinna gegn kynbundnum launamun og kyngreindum búferlaflutningum,“ segir í tillögunum.

3,2 milljarðar í nýsköpun og frestun stóriðjuframkvæmda

Þá leggja Vinstri grænir einnig til að varið verði einum milljarði króna til Nýsköpunarsjóðs, einum milljarði til Tækniþróunarsjóðs, allt að 500 milljónum til atvinnuþróunarfélaga, allt að 250 milljónum til aukins markaðsstarfs á sviði ferðamála og allt að 250 milljónum til umhverfisaðgerða og uppbyggingar þjóðgarða.

Í tillögum um stóriðjuframkvæmdir segir, „Að stöðva um sinn og stjórna síðan tímasetningu stóriðju- og stórframkvæmda með því að kaupa rannsóknarniðurstöður og greiða fyrirtækjum útlagðan undirbúningskostnað. Einnig verði heimilt að stöðva leyfisveitingar innan tilgreindra tímamarka sé það nauðsynlegt til að ná efnahagslegum stöðugleika og varðveita hann. Aðgerðir á svið umhverfismála fái 200 m.kr viðbótarfjármagn.“

Þjóðhagsráð

Þá leggja Vinstri grænir til að sett verði á stofn sérstak Þjóðhagsráð, skipað fulltrúm þingflokka og hagsmunaaðila, sem veitir stjórnvöldum ráðgjöf, metur framvindu og horfur í þjóðarbúskapnum og gefur mánaðarlega álit um stöðu mála.

Einnig er lagt til að Þjóðhagsráð skoði hvort ástæða sé til að endurreisa Þjóðhagsstofnun eða hliðstæðri fagstofnun og hvernig styrkur lífeyrissjóðanna megi best nýtast innan hagkerfisins

Að lokum er lagt til að varið sé allt að 100 milljónum króna til að efla starfsemi Fjármálaeftirlitsins, einkum á sviði áhættugreiningar og áhættuprófana fjármálafyrirtækja.