*

mánudagur, 25. janúar 2021
Erlent 17. júlí 2020 09:10

Áskrifendum fjölgaði um 10 milljónir

Hagnaður Netflix á öðrum ársfjórðungi var um þrefalt hærri en á sama tímabili í fyrra.

Ritstjórn
european pressphoto agency

Fjöldi áskrifenda Netflix óx um 10,1 milljón á öðrum ársfjórðungi, sem er umfram væntingar fjárfesta. Áskrifendafjöldi streymisveitunnar hefur því aukist um 26 milljónir á árinu, sem er einungis tveimur milljónum minna en fyrir allt síðasta ár. Skynews segir frá

Fyrirtækið varaði þó við því að vöxtur nýrra áskrifenda væri byrjaður að fjara út og áætlar að áskrifendafjöldi muni einungis hækka um 2,5 milljónir á þriðja ársfjórðungi, þ.e. frá júlí til september. Hlutabréf Netflix lækkuðu um 10% í viðskiptum eftir lokun markaða.

„Líkt og við gerðum ráð fyrir, þá hægðist á vexti þar sem neytendur komust í gegnum upphafsskell Covid og samkomutakmarkana,“ segir í bréfi félagsins til hluthafa. Einnig kom fram að takmarkanir á félagslegum þáttum hafi ýtt undir áskriftir. Fyrirtækið varaði þó við aukinni óvissu yfir kvikmyndatökum í Bandaríkjunum vegna fjölda smita.

Hagnaður streymisveitunnar nam 720 milljónum dollara, eða um 101 milljarð íslenskra króna, á öðrum ársfjórðungi sem er nær þreföldun frá sama tímabili í fyrra.

Stikkorð: Netflix