Nýi lýðræðisflokkurinn í Grikklandi, sem hefur stýrt landinu síðan 2019, vann sigur í þingkosningum í gær. Flokkurinn, sem fékk 41% atkvæða, náði þó ekki hreinum meirihluta á gríska þinginu og verður því boðaði til nýrra kosninga eftir mánuð.
Talið er líklegt að flokkurinn muni þá ná meirihluta í þinginu með svipuðum niðurstöðum.
Kyriakos Mitsotakis, forsætisráðherra Grikklands, fer fyrir flokknum en talið er að efnahagsleg uppsveifla síðustu mánaða hafi skilað sigrinum. Vinstri flokkurinn Syriza fékk 20% atkvæða og miðju-vinstri flokkurinn Pasok fékk 11,5% atkvæða.
Samsteypustjórn ólíkleg
Vegna breytinga á kosningalögum Grikklands þarf hreinan meirihluta á gríska þinginu og því þarf Mtsotakis annað hvort að mynda samsteypustjórn eða boða til nýrra kosninga. Að öllum líkindum verður síðari kosturinn fyrir valinu.
Árangur Nýja lýðræðisflokksins í kosningunum var mun betri en kannanir gerðu ráð fyrir en ljóst er að kjósendur vildu halda áfram á þeirri vegferð sem landið hefur verið á á síðustu árum.
Matsfyrirtækið S&P hækkaði nýverið lánshæfiseinkunn gríska ríkisins úr ruslflokk í fjárfestingarflokk, en skuldabréf gríska ríkisins hafa verið í ruslflokki frá árinu 2010.
Það hefur haft í för með sér hærri fjármagnskostnað og var Seðlabanka Evrópu auk þess bannað um tíma að kaupa grísk skuldabréf. Þá var gríska ríkið á barmi gjaldþrots í byrjun árs 2012 og var lengi vel kallað eftir úrsögn Grikklands úr ESB vegna gegndarlausrar skuldasöfnunar.
Nú horfir hins vegar til bjartari tíma, en S&P hefur nýlega breytt horfum landsins úr stöðugum í jákvæðar. Ferðaþjónustan, stærsta útflutningsstoð landsins, hefur farið kröftuglega af stað eftir faraldur og mældist hagvöxtur í Grikklandi 8,4% árið 2021 og 5,9% í fyrra. Þá hefur skuldahlutfallið ekki mælst lægra í rúman áratug.