Heildarafli íslenskra skipa í nýliðnum októbermánuði var 137.400 tonn og er það rúmlega 7.900 tonnum minni afli en í októbermánuði 2003 en þá veiddust 145.350 tonn. Milli októbermánaða 2003 og 2004 jókst verðmæti fiskaflans, á föstu verði ársins 2002, um 0,9%. Það sem af er árinu 2004 hefur verðmæti fiskaflans, á föstu verði ársins 2002, dregist saman um 0,8% miðað við árið 2003.
Botnfiskafli var 43.600 tonn samanborið við 40.600 tonn í októbermánuði 2003 og nemur samdrátturinn 3.000 tonnum á milli ára. Þorskafli var 19.500 tonn en 18.800 tonn bárust á land í október 2003 og því jókst þorskaflinn um tæplega 700 tonn á milli ára. Af ýsu veiddust 8.900 tonn en í fyrra veiddust 8.000 tonn og nemur aukning ýsuaflans því 900 tonnum. Karfaafli var tæplega 3.700 tonn í októbermánuði í ár en var 4.600 tonn í fyrra og er það 900 tonna samdráttur milli ára.
Flatfiskafli var 2.100 tonn og dróst saman um 240 tonn frá októbermánuði 2003. Af grálúðu veiddust 640 tonn og 550 tonn veiddust af skarkola.
Afli uppsjávartegunda nam 90.300 tonnum, þar af var kolmunnaafli 53.100 tonn og síldarafli 37.100 tonn. Í samanburði við afla októbermánaðar 2003 er samdráttur í kolmunna 7.600 tonn og í síldaraflinn dróst saman um 1.300 tonn.
Skel- og krabbadýraafli var 1.400 tonn samanborið við 3.300 tonna afla í október 2003. Mestur var samdrátturinn í rækjuaflanum eða 1.300 tonn en einnig var nokkur samdráttur í kúfiskafla eða tæplega 700 tonn.
Á fyrstu tíu mánuðum ársins 2004 nemur heildarafli íslenskra fiskiskipa 1.506.000 tonnum og er það samdráttur um 243.000 tonn frá árinu 2003. Botnfiskafli var 411.000 tonn sem er 17.700 tonnum meiri afli en í fyrra. Flatfiskafli hefur dregist saman um 5.000 tonn og uppsjávarafli hefur einnig dregist saman eða sem nemur 244.000 tonnum. Þar af er samdrátturinn 162.800 tonn í loðnuafla, 31.400 tonn í síldarafla og 49.600 tonn í kolmunnaafla. Þá er skel- og krabbadýraaflinn 12.100 tonnum minni í ár en á sama tímabili ársins 2003.
