Heildar­mat fast­eigna hækkar um 11,7%

Heildar­mat fast­eigna á Ís­landi hækkar um 11,7% frá nú­verandi mati og verður 14,4 billjónir króna, sam­kvæmt fast­eigna­mati HMS fyrir árið 2024. Í fyrra hækkaði heildar­matið um 19,9%. Verðbólga hefur verið að mælast tæplega 10% síðustu mánuði þannig raunhækkunin nemur nokkur prósentum.

Fast­eigna­matið miðast við markaðs­verð hús­næðis í febrúar­mánuði ár hvert og tekur nýtt mat gildi 31. desember. Fast­eigna­matið er á­lagningar­stofn fast­eigna­skatts, annar stærsti tekju­stofn sveitar­fé­laga, sem er lagður á ár­lega.

Hús­næðis- og mann­virkja­stofnun tók við verk­efnum fast­eigna­skrár af Þjóð­skrá í júlí 2022.

Sam­kvæmt kynningu HMS hækkar fast­eigna­mat í­búða um 13,7% milli ára og verður verður alls 10,6 billjónir króna. Þar af hækkar sér­býli um 14,3% á meðan fjöl­býli hækkar um 13,1%.

Fast­eigna­mat í­búða á höfuð­borgar­svæðinu hækkar um 13% á meðan hækkunin er 16,1% á lands­byggðinni.

Í­búðar­mat hækkar mest í Skaga­byggð

Fast­eigna­mat í­búða hækkar mest í Skaga­byggð en þar hækkar í­búðar­matið um 43,9%, í Reyk­hóla­hrepp um 43,5% og í Vestur­byggð um 33,6%. Breyting á í­búða­mati er nei­kvæð í Grundar­fjarðar­bæ þar sem fast­eigna­mat í­búða lækkar um 0,9%, en minnst hækkun er í Stykkis­hólmi þar sem hækkunin er 3,3%.

Fast­eigna­mat sumar­húsa upp um 12,7%

Fast­eigna­mat at­vinnu­hús­næðis hækkar um 4,8% á landinu öllu; um 4,5% á höfuð­borgar­svæðinu en um 5,4% á lands­byggðinni. Þá hækkar fast­eigna­mat sumar­húsa um 12,7% á landinu öllu.

Hægt er að sjá fasteignamat á höfuðborgarsvæðinu milli ára hér að neðan.