Örflöguframleiðandinn Nvidia hefur kynnt nýja gervigreindarörflögu en fyrirtækið segir að vinnsluhraði flögunnar verði um 30 sinnum meiri en hjá forvera hennar. Örflagan, B200 Blackwell, er uppfærð útgáfa af H100-flögunni sem fór á markað í fyrra.
Jensen Huang, forstjóri Nvidia, greindi frá því að Amazon, Google, Microsoft og OpenAI væru meðal viðskiptavina sem viðbúið er að myndu nota flöguna.
Nvidia er með 80% markaðshlutdeild og vonast til að styrkja stöðu sína enn frekar á markaðnum. Fyrirtækið er þar að auki þriðja verðmætasta fyrirtæki Bandaríkjanna, á eftir Microsoft og Apple.
Hlutabréf Nvidia hækkuðu um 240% á síðasta ári og nam markaðsvirði fyrirtækisins 2.000 milljörðum Bandaríkjadala í síðasta mánuði. Nvidia býst við því að tekjurnar verði um 24 milljarðar dala á fyrsta ársfjórðungi þessa árs.
Fyrir einungis níu mánuðum varð Nvidia fyrsti örflöguframleiðandinn til að ná markaðsvirði yfir 1.000 milljarða Bandaríkjadali. Síðan þá hefur virði félagsins næstum tvöfaldast en miðað við gengi félagsins við lokun markaða í gær nam markaðsvirði um 1.800 milljörðum dala.
