Bankaráð Landsbankans segir fjarri sanni að sú leið sem var valin til að fjármagna kaup bankans á TM tryggingum hafi verið til þess að komast hjá því að leita samþykkis hluthafafundar.
Tryggvi Pálsson, stjórnarformaður Bankasýslunnar, sagði í samtali við Morgunblaðið að eina leiðin til að þess að kaupa TM án þess að spyrja hluthafa hafi verið valin.
„Ekki var þörf á útgáfu nýs hlutafjár“
Bankaráð taldi sig engu að síður knúið til að svara þessu og segir í yfirlýsingu sinni í dag að fjármögnunarleiðin hafi verið valin vegna þess að hún er til þess fallin að viðhalda getu bankans til að greiða reglulegar arðgreiðslur til framtíðar.
„Þessi leið var talin hagstæðust fyrir bankann og eigendur hans. Ekki var þörf á útgáfu nýs hlutafjár, enda verða eiginfjárhlutföll bankans vel yfir lögbundnum mörkum og markmiðum bankans. Hefði Landsbankinn ætlað sér að greiða fyrir TM með útgáfu nýs hlutafjár, hefði þurft samþykki hluthafafundar,“ segir í yfirlýsingu bankaráðs.
Fjölmiðlar hafa vakið athygli á því að í tilboði Íslandsbanka í TM var settur fyrirvari um samþykki hluthafa en slíkan fyrirvara var ekki að finna í tilboði Landsbankans.
Bankaráðs Landsbankans bendir á að Íslandsbanki staðfesti á aðalfundi sínum að tilboð bankans í TM gerði ráð fyrir hlutafjáraukningu. Í fundargerð aðalfundar Íslandsbanka kemur fram að „tilboð bankans í TM tryggingar hf. hafi verið gert með þeim fyrirvara að hluthafafundur Íslandsbanka samþykki útgáfu nýs hlutafjár til greiðslu kaupverðs“.
Að mati Landsbankans var hagstæðast að greiða með handbæru fé og gefa í kjölfarið út víkjandi skuldabréf að fjárhæð 13,5 milljarðar króna sem greiðist upp eftir fimm ár, en ekki með því að auka hlutafé.
„Líkt og rakið er í greinargerð bankaráðs Landsbankans til Bankasýslu ríkisins frá 22. mars sl. er eiginfjárbinding Landsbankans vegna kaupanna á TM um 18,7 milljarðar króna. Eiginfjárstaða bankans fyrir kaupin er 23,6%. Áhrif kaupanna eru lækkun um 1,5 prósentustig og eftir kaupin yrði eiginfjárhlutfallið 22,1%. Mótvægisaðgerðir hækka hlutfallið aftur í 23,1%. Eiginfjárkrafa á bankann er 20,7%. Viðmið bankans er að vera ávallt yfir lágmarkskröfu. Staðan er því sú að eftir kaup TM og með eða án mótvægisaðgerða yrði bankinn alltaf vel yfir eiginfjárkröfum,“ segir í yfirlýsingu bankans.
Þá ítrekar bankaráð að kaupin séu að þeirra mati í samræmi við eigendastefnu ríkisins líkt og fram kom í skýrslu bankaráðs til Bankasýslunnar í lok mars. Bankaráð rökstyður þá fullyrðingu ekki frekar en ítrekar einnig að Bankasýslan hafi verið nægilega upplýst um kaupin að þeirra mati þar sem bankaráð lét vita af áhuga á TM í lok síðasta árs.