Sjö stjórnendur Íslandsbanka, þar af eru sex í framkvæmdastjórn, keyptu í dag hlutabréf í bankanum fyrir samtals 17 milljónir króna. Hlutabréfagengið í viðskiptunum nam 125,6 krónum á hlut. Þetta kemur fram í Kauphallartilkynningu .
Birna Einarsdóttir bankastjóri, Ásmundur Tryggvason, framkvæmdastjóri fyrirtækja og fjárfesta, og Jón Guðni Ómarsson fjármálastjóri keyptu hver um sig 31,8 þúsund hluti á tæplega 4 milljónir króna.
Una Steinsdóttir, framkvæmdastjóri viðskiptabanka keypti fyrir tæplega 2 milljónir króna. Þá keyptu Riaan Dreyer, framkvæmdastjóri upplýsingasviðs, Guðmundur Birgisson, framkvæmdastjóri áhættustýringar og Tómas Sigurðsson yfirlögfræðingur öll hlut í bankanum fyrir um eina milljón króna hvert.
