Jón Björnsson, fyrrverandi forstjóri Festi, var tekjuhæsti forstjóri landsins í fyrra og námu tekjur hans að jafnaði 28,4 milljónum króna á mánuði, samkvæmt álagningarskrám ríkisskattstjóra. Jón hætti sem forstjóri fyrirtækisins síðasta haust en rekstrarfélög þess eru N1, Krónan, Elko og Bakkinn.

Þetta er meðal þess sem fram kemur í tekjublaði Frjálsrar verslunar sem kom út í dag. Í blaðinu má finna upplýsingar um tekjur tæplega ríflega 3.700 Íslendinga. Að þessu sinnir eru tveir nýir flokkar í blaðinu. Annars vegar yfir tekjur áhrifavalda á samfélagsmiðlum og hins vegar fasteignasala.

Þá námu tekjur Kára Stefánssonar, forstjóra Íslenskrar erfðagreiningar, að jafnaði 27,5 milljónum króna á mánuði. Þess ber að geta að stærsti hluti tekna Kára á síðasta ári var einskiptisgreiðsla vegna séreignarsparnaðar hjá lífeyrissjóði. Mánaðarlaun hans hjá Íslenskri erfðagreiningu námu um 7,5 milljónum króna á síðasta ári og breyttust ekki á milli ára.

Næstir koma Vilhelm Róbert Wessman , forstjóri Alvogen , með 27,4 milljónir og Tómas Már Sigurðsson, fyrrverandi forstjóri hjá Alcoa í Bandaríkjunum, sem var með 14,7 milljónir.

Tíu tekjuhæstu forstjórarnir árið 2018

  1. Jón Björnsson, fv. forstjóri Festi    28,4 milljónir
  2. Kári Stefánsson, forstjóri Íslenskrar erfðagreiningar     27,5 milljónir
  3. Vilhelm Róbert Wessman , forstjóri Alvogen 27,4 milljónir
  4. Tómas Már Sigurðsson, fv. forstjóri hjá Alcoa USA 14,7 milljónir
  5. Valur Ragnarsson, fv. forstjóri Medis 10.4 milljónir
  6. Grímur Karl Sæmundsen , forstjóri Bláa Lónsins     10,3 milljónir
  7. Árni Oddur Þórðarson, forstjóri Marels     8.9, milljónir
  8. Jón Þorgrímur Stefáns., forstjóri NetApp 8.2 milljónir
  9. Carlos Cruz , fv. forstjóri Coca Cola á Íslandi     8.1 milljón
  10. Rannveig Rist, forstjóri Rio Tinto Alcan á Íslandi     6.2 milljónir

Útreikningar Frjálsrar verslunar byggja á útsvarsskyldum tekjur á árinu 2018 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Í launum sumra kann að vera falinn bónus vegna starfa á fyrri ára. Miðað er við útsvarsstofn samkvæmt álagningarskrá. Í tölunum eru ekki fjármagnstekjur, t.d. af vöxtum, arði eða sölu hlutabréfa. Sleppt er skattfrjálsum dagpeningum, bílastyrkjum og greiðslum í lífeyrissjóði.

Tekjublað Frjálsrar verslunar kom út í morgun. Finna má blaðið á helstu sölustöðum en einnig má panta eintak hér .