Íslenska Viðskiptaráðið í Japan hvetur íslensk og japönsk stjórnvöld til að ljúka fjórum mikilvægum tvíhliða samningum í fréttatilkynningu frá ráðinu.

Íslenska Viðskiptaráðið í Japan fagnar áherslum nýs utanríkisráðherra Guðlaugs Þórs Þórðarsonar um bætt samskipti við Asíuríki, þar með talið Japan, eins og fram hefur komið í ræðum ráðherra á Alþingi og í ávarpi ráðherra á málþingi um framtíð utanríkisþjónustunnar í Norræna húsinu þann 6. apríl síðastliðinn.

Ráðið vill einnig óska nýjum sendiherra Japans á Íslandi, Yasuhiko Kitagawa, til hamingju með skipan í embætti.

Viðskiptaráðið fagnar því að áhrifamaður úr japönsku viðskiptalífi hafi verið skipaður sendiherra á Íslandi en Yasuhiko Kitagawa er fyrrverandi aðstoðarforstjóri viðskiptaþróunarsviðs Mitsubishi Corporation, eins elsta og stærsta alþjóðlega þróunar- og fjárfestingafyrirtækis Japans.

Í ljósi þessa hvetur Viðskiptaráðið stjórnvöld Íslands og Japans til að ljúka gerð fjögurra mikilvægra og tímabærra tvíhliða samninga:

  • Fríverslunarsamningur

Japan er stærsti útflutningsmarkaður Íslands í Asíu, en ráðið vill fríverslunarsamning milli landanna, mögulega sem hluti af efnahags-samstarfssamningi Japans og EFTA.

Bæði Ísland og Japan treysta á frjáls alþjóðleg viðskipti fyrir vörur sínar og þjónustu. Þann 1. mars 2016 sendu íslensk stjórnvöld sterk skilaboð til japanskra stjórnvalda með þverpólitísku samþykki tillögu á Alþingi þess efnis að fela ríkisstjórninni að hefja undirbúning fríverslunarsamnings við Japan á grundvelli yfirlýsinga japönsku ríkisstjórnarinnar um að auka hlut fríverslunar í milliríkjaviðskiptum.

Viðskiptaráðið hefur tekið virkan þátt í að styðja þetta mál og vonar að sem fyrst hefjist formlegar viðræður á milli ríkjanna.

Japan og Evrópusambandið eru sem stendur að ljúka efnahags-samstarfssamningi („Economic Partnership Agreement (EPA)“) sem inniheldur bæði fríverslunarsamning og samning um önnur mikilvæg tvíhliða mál.

Þegar sá samstarfssamningur hefur verið samþykktur telur Viðskiptaráðið kjörið tækifæri að Japan geri samskonar efnahags-samstarfssamning við Ísland í gegnum Fríverslunarsamtök Evrópu (EFTA). Innan EFTA er einungis Sviss með fríverslunarsamning við Japan.

Ef japönsk stjórnvöld hafa ekki tök á að hefja tvíhliða fríverslunarviðræður við Ísland sem allra fyrst, þá hvetur Viðskiptaráðið íslensk og japönsk yfirvöld að hefja viðræður um efnahags-samstarfssamning, sem inniheldur m.a. fríverslunarsamning,  í gegnum EFTA, um leið og Japan hefur lokið slíkum samningi við Evrópusambandið.

  • Tvísköttunarsamningur

Viðskiptaráðið fagnar því að fyrstu formlegu viðræðurnar um tvísköttunarsamning á milli Japans og Íslands hefjist þann 17.-19. maí næstkomandi.

Viðskiptaráðið hefur lengi talað fyrir slíkum samningi sem mun hafa mjög jákvæð áhrif fyrir marga meðlimi ráðsins og styrkja og efla viðskipti landanna almennt.

  • Loftferðasamningur.

Ísland hefur í um tvo áratugi leitast við að ljúka gerð loftferðasamnings við Japan. Viðskiptaráðið telur að slíkur samningur myndi styrkja enn frekar efnahagslegt samband ríkjanna, sérstaklega á sviði ferðamennsku, fjárfestinga, sjávarútvegs og landbúnaðar.

Milli áranna 2015 og 2016 hefur fjöldi ferðamanna frá Japan til Íslands aukist um 35%, og fjöldi ferðamanna frá Íslandi til Japans tvöfaldaðist frá 2006 til 2016.

  • Samningur um gagnkvæm tímabundin atvinnuréttindi

Eitt af markmiðum Viðskiptaráðsins er að styðja við ungt fólk frá Íslandi og Japan sem hefur áhuga á að heimsækja og starfa í löndunum. Viðskiptaráðið hvetur því íslensk og japönsk stjórnvöld að ljúka samningi um gagnkvæm tímabundin atvinnuréttindi („working holiday“) sem veitir ungu fólki frá báðum ríkjum heimild til að starfa í ákveðinn tíma í hinu landinu.

Íslenskukennsla er m.a. við helsta einkaháskóla Japans, Waseda University, og japanska er eitt vinsælasta erlenda tungumálið sem kennt er við Háskóla Íslands. Samningurinn myndi skapa ótal tækifæri fyrir ungt fólk frá Japan og Íslandi til að læra nýtt tungumál og á sama tíma komast inn í atvinnulíf viðkomandi lands.

Samningurinn yrði mjög áhugaverður fyrir japönsk og íslensk fyrirtæki sem eru í viðskiptum við hitt ríkið eða vilja styrkja sinn rekstur og auka fjölbreytileika innan fyrirtækisins.

Um Íslenska Viðskiptaráðið í Japan

Ráðið var stofnað árið 2003 í því skyni að styrkja viðskipti milli Íslands og Japans. Íslenska Viðskiptaráðið er helsti fulltrúi íslenskra viðskiptahagsmuna í Japan.

Viðskiptaráðið starfar einnig náið með íslenska sendiráðinu í Japan við að efla viðskipta- og fjárfestingaumhverfi fyrir íslensk fyrirtæki í Japan. Heiðursformaður Viðskiptaráðsins er Hannes Heimisson, sendiherra Íslands í Japan.

Viðskiptaráðið starfar náið með öðrum erlendum viðskiptaráðum í Japan og er meðlimur Evrópska viðskiptaráðsins í Japan. Japan er eins fyrr sagði stærsti útflutningsmarkaður Íslands í Asíu og árið 2016 fögnuðu ríkin 60 ára stjórnmálasambandi.

Viðskiptaráðið er skipað yfir þrjátíu fulltrúum, m.a. frá nokkrum af stærstu fyrirtækjum Japans og Íslands. Þar má nefna Toyota Tsusho, eitt af stærstu fjárfestingafyrirtækjum Japans.

Fuji Electric og Mitsubishi Hitachi Power Systems, tvö af stærstu orkuframleiðslubúnaðar fyrirtækjum heims. Maruha Nichiro, stærsta sjávarútvegsfyrirtæki heims. Mori, stærsta fasteignafélag Japans.

Stór íslensk fyrirtæki eins og Icelandic, Icelandair, Eimskip, Össur, Grandi og söluskriftstofa Samherja eiga einnig fulltrúa í Viðskiptaráðinu.