*

miðvikudagur, 11. desember 2019
Innlent 12. nóvember 2019 15:22

Hermt eftir RÚV og Viðskiptablaðinu

Nýjasta falsfréttasíðan er bein endurritun á frétt RÚV um Ástþór Magnússon. Hann líka notaður í eftirlíkingu af VB.is.

Ritstjórn
Falsfréttasíðan notar eftirlíkingu af frétt um forsetaframbjóðandann Ástþór Magnússon, en falsararnir hafa áður misnotað sér nafn hans og mynd á síðum sem herma eftir útliti Viðskiptablaðsins.
Aðsend mynd

Eftirlíking af vefsíðu RÚV er sú nýjasta sem svikarar sem virðast herja á íslenska vefmiðla og notendur hermt eftir, nú með frétt frá 2014 um tveggja ára rannsókn vegna falsaðra undirskrifta framboðs Ástþórs Magnússonar til forseta tveimur árum fyrr.

Sú frétt virðist koma upp hjá sumum notendum, þar á meðal blaðamönnum Viðskiptablaðsins, meðan aðrir notendur fá upp síðu sem hermir eftir Viðskiptablaðinu en ef smellt er á tengla á henni kemur upp falsrafmyntaviðskskiptasíðan Bitcon Circuit.

Fréttin sem líkir eftir síðu RÚV virðist alger eftirlíking RÚV fréttarinnar frá sínum tíma og virðist í því formi ekki gerð til að plata fólk til að leggja peninga inn á fyrirtæki sem þykist ætla að græða fullt af peningum fyrir notendur á því að kaupa og selja rafmyntina Bitcoin. Eins og ekki á að þurfa að nefna eru slíkar síður ekki raunveruleg ávöxtun fjármuna.

Þó má ekki útiloka að þarna sé verið að vinna með útlit RÚV til þess að herma eftir því fyrir einhvern annarlegan tilgang síðar, en Ástþór Magnússon hefur einmitt verið notaður í álíka falsfréttum sem hermt hafa eftir Viðskiptablaðinu líkt og fjallað hefur verið ítarlega um á þessum síðum, og frést hefur af vera komnar aftur á kreik.

Á hann að geta rekið auð sinn frá svona viðskiptum, en aðrir íslenskir auðmenn eru sagðir hafa grætt á þeim með mjög svipuðum uppsetningum á eftirlíkingu sem gengið hefur undir nafninu Viðskiptabaðið, þar sem L vantar í nafn miðilsins.

Lesendur sem sjá slíkar falsfréttir koma upp á samfélagsmiðlum eða annars staðar eru beðnir um að tilkynna um þær með þartilgerðum hnappi í hægra efra horninu til að mynda á Facebook.