*

mánudagur, 15. júlí 2019
Innlent 8. maí 2019 07:22

Segir ársreikning borgarinnar viðvörun

„Þessi ársreikningur sendir borgarstjórn gula spjaldið,“ segir oddviti Sjálfstæðismanna í borgarstjórn.

Ritstjórn
Eyþór Arnalds er oddviti Sjálfstæðismanna í Reykjavík sem eru í minnihluta í borgarstjórn. Flokkurinn fékk flesta borgarfulltrúa í síðustu kosningum.
Haraldur Guðjónsson

Fyrri umræða um ársreikning Reykjavíkurborgar fyrir árið 2018 fór fram á fundi borgarstjórnar í gær, en eins og Viðskiptablaðið greindi frá fyrir viku dróst rekstarafgangur borgarinnar saman um 5% frá fyrri ári.

Eyþór Laxdal Arnalds, oddviti Sjálfstæðisflokksins í borgarstjórn Reykjavíkur, sagði bólueinkenni mikil í rekstri borgarinnar enda vísbendingar um að hagsveiflan sé búin. „Ekki hefur tekist að greiða niður skuldir í góðæri og skuldasöfnun A-hluta og samstæðu halda áfram að vaxa á fullu. Skuldir hækka um 25 milljarða á síðasta ári, meira en tvo milljarða á mánuði," sagði Eyþór.

„Skuldir voru 324 milljarðar um áramót en áttu að vera 299 milljarðar samkvæmt fjárhagsáætlun. Við sjáum það að rekstrarkostnaður hækkar umfram verðlag þrátt fyrir að kjarasamningum sé ekki lokið.  Fjárfestingar eru hressilegar umfram afgang en ég velti fyrir mér hvort bjartsýni borgarstjóra muni koma okkur í gegnum það."

Eyþór bætti við að reiknaðir liðir hafi hækkað eigið fé og hagnað um meira en 60 milljarða. „Það er ekki gott að styðjast við einskiptis uppreikning á eignum og telja að það sé eitthvað sem komið til með að vera. Síðan er það óinnheimtur en tekjufærður byggingarréttur sem er upp á marga milljarða króna. Einskiptishagnaður minnkar skarpt þegar hagsveiflan stöðvast,“ sagði Eyþór í ræðu sinni.

Niðurstaðan sé aðvörun

„Fjármagnskostnaður vex hvort sem það er vegna verðbólgu eða vegna erfiðleika sem kunna að verða á fjármagnsmörkuðum. Þessi niðurstaða, þ.e. ársreikningur Reykjavíkurborgar, er aðvörun og við berum ábyrgð á að þessi niðurstaða sé í lagi,“ sagði Eyþór.

„Þegar við sjáum að skuldir eru að vaxa langt umfram það sem var hérna fyrir ári síðan þá verðum við að skoða það. Þessi fyrsti ársreikningur á árinu sendir borgarstjórn gula spjaldið, enda afgangur sem var upp á 28 milljarða 2017 að minnka um 60% milli ára. Þá eru fjárfestingarnar hærri en reksturinn leyfir. Álögur eru að sama skapi í botni, þ.e. útsvar, fasteignagjöld, sorphirðugjöld o.s.frv. og þá spyr maður sig hvort við séum samkeppnishæf við önnur sveitarfélög þegar álögur eru jafn háar og raun ber vitni.“

Hér má sjá bókun Sjálfstæðisflokks við fyrri umræðu um ársreikning Reykjavíkurborgar:

Tekjur Reykjavíkurborg hafa aldrei verið meiri, enda skattar í hámarki og gjöld í hæstu hæðum. Afkoma borgarinnar er þó lakari en árið 2017 enda vaxa gjöldin hratt. Launakostnaður vex um 10% milli ára af reglulegum rekstri. „Annar rekstrarkostnaður“ vex um 8%. Þá vekur sérstaka athygli að skuldir borgarinnar halda áfram að vaxa í góðæri. Skuldir borgarsjóðs hækka um átta milljarða og eru 108 milljarðar um áramót. Heildarskuldir borgarinnar hækka enn meira eða um 25 milljarða og eru 324 milljarðar í lok síðasta árs. Það er hækkun um rúma 2 milljarða á mánuði árið 2018. Þetta gerist á sama tíma og ríkissjóður lækkar skuldir sínar. Afgangur af rekstri dugar ekki fyrir fjárfestingum og fjármagnskostnaður borgarinnar snarhækkar á milli ára.

Sjá einnig viðtal við Eyþór um stöðu mála í Reykjavík úr síðasta tölublaði Viðskiptablaðsins:

25 ára afmælistilboð VB – 50% afsláttur af áskrift

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti.
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir í 4 mánuði. Áskrifendur fá Viðskiptablaðið, Frjálsa verslun og Fiskifréttir sent ásamt vefaðgangi að vb.is og fiskifrettir.is