Tunna af hráolíu hefur hækkað um 19% í fyrstu viðskiptum dagsins í Singapúr. Ástæðan er árás sem gerð var á eina stærstu olíuvinnslustöð í Sádi-Arabíu. Áætlað er að árásin hafi eytt um fimm prósentum af birgðum heimsins af orkugjafanum.
Í fyrstu viðskiptum dagsins í Singapúr stökk hráolíutunnan upp um tæpa 12 dollara og stendur nú í tæpum 72 dollurum. Sagt er frá á vef Bloomberg . Eins og Viðskiptablaðið sagði frá í morgun eru Bandaríkjamenn tilbúnir að nýta olíubirgðir sínar, sem duga ættu í 110 daga, til að draga úr verðsveiflum, en einnig hafa Sádi Arabar farið þess á leit við önnur OPEC ríki að þau framleiði meira.
Árásin átti sér stað á laugardag. Áætlað er að um framleiðslugeta upp á 5,7 milljón daglegar tunnur hafi tapast vegna hennar. Um er að ræða mestu truflun á olíuframleiðslu í sögunni, stærri tjónið sem af hlaust í kjölfar byltingarinnar í Íran 1979 og innrás Íraka í Kúveit árið 1990.
„Hagkerfi heimsins má illa við hærra heimsmarkaðsverði á olíu á þessum tíma efnahagssamdráttar,“ hefur Bloomberg eftir Ole Hansen hjá hinum danska Saxo Bank.
Sádar telja að þeim muni takast að koma framleiðslunni á skrið innan nokkurra daga en óljóst er hvenær fullri framleiðslugetu verður náð á nýjan leik. Mögulegt er að ríkisolíufyrirtækið Aramco muni ekki geta staðið við samninga um afhendingu á olíu ef nokkrar vikur tekur að ná fullri getu.
Uppfært 16. september 08:31 Frá því fréttin var rituð hefur hækkunin gengið til baka að hluta. Stendur tunnan nú í tæpum 68 dollurum.
Hér má sjá fleiri fréttir um olíuframleiðslufyrirtæki Sádi Arabíu, Aramco:
- 15. september 2019 - Tóku út 5% af olíuframleiðslu heims
- 9. ágúst 2019 - Reyna stærstu skráningu sögunnar á ný
- 7. apríl 2019 - Aramco opnar bækurnar
- 13. febrúar 2019 - Sádi-Arabía ætlar í útrás
- 12. nóvember 2018 - Olíuverð hækkar eftir ummæli al-Falih
- 27. ágúst 2018 - Saudi Aramco missir eilífðarréttindin
- 13. apríl 2018 - Arðbærasta fyrirtæki heims
- 9. apríl 2018 - Kauphöllin gæti margfaldast að stærð
- 20. mars 2018 - Stærsta hlutabréfaútboði sögunnar frestað
- 26. maí 2017 - Olíuverð lækkar í kjölfar samkomulags
- 27. febrúar 2017 - Ofmeta ríkisolíufyrirtækið
- 8. febrúar 2017 - Aramco réði Moelis & Company
- 13. október 2016 - Stærsta hlutafjárútboð sögunnar
- 1. apríl 2016 - Vilja stofna gífurstóran olíusjóð
- 7. janúar 2016 - Íhuga að selja hluti í stærsta olíufyrirtæki heims
- 21. janúar 2015 - Tíu stærstu olíufyrirtæki heims