Hlutir margra stærstu eigenda í Icelandair minnka í kjölfar hlutafjárútboðs félagsins fyrir helgi , þar á meðal þeirra stærstu Stefnis og Lífeyrissjóðs verzlunarmanna, en þeir hafa verið stærsti og næststærstu eigendurnir í Icelandair að því er Fréttablaðið segir frá.
Aðrir stórir hluthafar eins og PAR Capital, Birta og Frjálsi lífeyrissjóðurinn tóku ekki þátt í útboðinu sem verið hefur í undirbúningi síðustu misseri , en nokkrir aðrir lífeyrissjóðir bættu nokkuð við hlut sinn, þar á meðal Almenni lífeyrissjóðurinn og Brú sem er nú kominn í tæplega 5% eignarhlut.
Ekki er vitað hvort Högni Pétur Sigurðsson eigandi Hard Rock Café sem var fyrir stærsti einkafjárfestirinn í Icelandair með 3,4% hlut hafi tekið þátt í útboðinu, en hins vegar tók Pálmi Haraldsson sem átti um 3% þátt í gegnum félög sín Sólvöll og Ferðaskrifstofu Íslands. Hins vegar tók Vænting ehf., fjárfestingafélag Bláa lónsins sem átti 1,3% fyrir, ekki þátt.
Afstaða fulltrúa launþega vakti furðu
Sjóðir í stýringu Stefnis, sem er sjóðstýringafyrirtæki Arion banka, áttu fyrir útboðið stærsta hlutann, 12,25% samanlagt í flugfélaginu en þó þeir hafi tekið þátt í útboðinu er talið að hlutur þeirra muni minnka töluvert með tilkomu nýrra hluthafa.
Enn frekar líkt og Viðskiptablaðið sagði frá í síðustu viku mun hlutur Lífeyrissjóðs Verzlunarmana, sem var næst stærsti hluthafinn með 11,8%, minnka því fjórir stjórnarmenn sjóðsins voru á móti, en fjórir með tillögu um kaup á bréfum fyrir 2,5 milljarða sem hefði látið sjóðinn nokkurn veginn halda sínum rúmlega 11 prósenta hlut í félaginu.
Haft er eftir Guðrúnu Hafsteinsdóttur, varaformanni stjórnar lífeyrissjóðsins að hún furði sig sig á afstöðu fulltrúa launþega um að hafna þátttöku en hún sagði fulltrúa atvinnurekenda hafa verið samstíga í því að taka þátt.
Margir stórir tóku ekki þátt öfugt við lífeyrissjóð starfsmanna ríkisins
Jafnframt mun eignarhlutur þriðja stærsta hluthafans, bandaríska fjárfestingarsjóðsins PAR Capital, minnka því hann tók ekki þátt í útboðinu. Sjóðurinn hafði verið stærsti eigandinn um tíma en selt sig smátt og smátt út síðustu misseri og var eignarhluturinn kominn niður í um 10% fyrir útboðið.
Eins og sagt var frá í fréttum á dögunum skráði sá fjórði stærsti, LSR, sig hins vegar fyrir nægilega hárri upphæð til að halda sínum 8,25% eignarhlut. Viðskiptablaðið sagði svo frá því fyrir helgi að Gildi , sem var fimmti stærsti eigandinn, tæki einnig þátt þrátt fyrir skiptar skoðanir í stjórninni, en ekki er vitað hvort hann hafi skráð sig fyrir nægilega mörgum hlutum til að halda sínum 7,24% hlut fyrir útboðið.
Sjötti stærsti eigandinn fyrir útboðið, Birta, tók heldur ekki þátt og mun því 7,07 hlutur hans í félaginu minnka sem nýju hlutunum nemur en þeir verða um 80% alls hlutafjár í félaginu.
Frjálsi lífeyrissjóðurinn, sem átti fyrir útboðið 2,84% hlut og var þar með sjöundi stærsti eigandinn, skráði sig heldur ekki fyrir nýjum hlutum, en sama gilti um bæði Festu lífeyrissjóð og Íslenska lífeyrissjóðinn, sem hvorugur voru þó í hópi tuttugu stærstu hluthafana fyrir útboðið.
Nýttu tækifærið til að stækka sinn hlut
Landsbréf voru svo áttundi stærsti eigandinn með 1,91% hlut fyrir útboðið en ekki er vitað um þátttöku þeirra, en sá níundi, Brú lífeyrissjóður sem var með 1,77% hlut, tók þátt fyrir tæplega 1,3 milljarða króna sem stækkar hlut sjóðsins í tæplega 4,8% í flugfélaginu.
Almenni lífeyrissjóðurinn tók einnig þátt, og jók hlut sinn úr 1,5% í 1,8% með kaupum á hlutum fyrir 441 milljón króna. Lífeyrissjóðurinn Lífsverk tók þátt en þeir áttu ekki stóran hluta fyrir, sem og Eftirlaunasjóður Félags íslenskra flugmanna, sem keypti fyrir 439 milljónir í flugfélaginu.
Íslandssjóðir, sjóðstýringafélag Íslandsbanka tóku vel þátt að sögn Kjartans Smára Höskuldssonar framkvæmdastjóra. Loks tók Stapi lífeyrissjóður þátt og ætluðu þeir að halda sínum 1,36% hlut og keyptu því fyrir 240 milljónir króna.
Hér má lesa frekari fréttir um hlutafjárútboð Icelandair:
- 18. september 2020 - LIVE tók ekki þátt í útboði Icelandair
- 18. september 2020 - Gildi tók þátt í útboði Icelandair
- 18. september 2020 - Boð upp á 37 milljarða í Icelandair
- 18. september 2020 - Boði Edwards í Icelandair hafnað
- 17. september 2020 - 2 milljóna velta þrátt fyrir útboð
- 17. september 2020 - Edwards að kaupa stóran hluta útboðsins?
- 17. september 2020 - LSR ætlar að halda sínu í Icelandair
- 16. september 2020 - Óvissa ríkir um aðkomu lífeyrissjóðanna
- 15. september 2020 - „Brugðið geti algerlega til beggja vona“
- 15. september 2020 - Gengið frá skjölum vegna lánalínu
- 12. september 2020 - Algjör óvissa með aðkomu hluthafa
- 11. september 2020 - Sjóðir geta skráð sig fyrir áskrift
- 9. september 2020 - Hluthafar samþykkja hlutafjárútboð
- 8. september 2020 - Kostnaður við útboðið 290 milljónir
- 4. september 2020 - Lágmarksboðið lækkað í 100 þúsund
- 2. september 2020 - Hlutafjáraukning heimild til 15. október
- 1. september 2020 - Sölutryggja 6 milljarða í Icelandair
- 19. ágúst 2020 - 250 þúsund lágmarksverð í útboðinu